Co fin de darlle visibilidade a todo o que se fai e se pode facer dende a nosa biblioteca, nace este blog, aberto a toda a comunidade educativa, con clara vocación de servir de humilde motor a un máis amplo programa de actuacións, programa que conforma ou está a pique de conformar o denominado Plan Lector do noso centro.Practicamente a meirande parte das bibliotecas escolares fan uso xa destas novas posibilidades que a rede nos ofrece, non somos polo tanto orixinais, pero non podemos nin queremos quedar descolgados. Consideramos que un blog é un xeito máis de dinamizar o uso dos nosos fondos bibliográficos e tamén audiovisuais, que é unha maneira de intercambiar información entre usuarios vencendo así as barreiras impostas polo estricto horario de clases.
Seremos capaces de entender que unha biblioteca non remata nos muros do espazo físico que a contén, que pode e debe de ir moito máis alá desa súa limitada arquitectura? Seguramente dende este mesmo instante, esa limitación é xa unicamente anecdótica, as paredes desaparecen, cando menos é eso o que pretendemos.
A partir de aquí, destes básicos argumentos, o que realmente poida dar de si esta nova ferramenta xa dependerá de todas e todos nós. Agardamos que en pouco tempo poidamos sentirnos satisfeitos dos resultados obtidos. Animádevos.
